Rivista Santa Maria del Bosco - Serra San Bruno e dintorni

Regola la dimensione del testo

Poesia pasqua 2016
Mi sianti Patre?
Arrivau l'ura da notte scura.
Restai sulu ammianzu a st'uartu.
Ti cíarcu e mi síantu 'ntuartu.
'Ntuartu pecchì mi spagnu,
'ntuartu pecchì non su forte
cuamu vorria.
Uamu mi facisti u diviantu
e a paura m'è cumpagna
'nta sta nottata i campagna.

Guardu st'alivi accussi belli
ca paranu amici fidili,
ciangianu cu'mmia
'nta st'ura vili.
Guardali, i discipuli
chi mi mandasti:
dormanu tutti stanchi
i cent'anni, atru c'amici
e apuastuli viari.
Sembranu hjacchi e minzugniari.

Io u sapìa c' accussi hfinia,
ma Patre, tuttu pett'ia rihfaria.
Eccu scurau e l'ura s'avvicina.
Domani sarà jornata
sempa ricordata.
Su stancu e non mi hfiju
u priagu cuamu
vorria, u sai ca si tuttu,
tu p' emmia.

Ecculi, stannu arrivandu.
Sordati, prevati e mangiatari.
Tutti mi cercanu, pari pari.
Ca c'era bisuagnu i tuttu su teatru?
Ccà sugnu e non mi muavu.
Non aviti bisuagnu di nuavu?
Quandu i miraculi vi hafacìa,
a tutti vi piacìa, ora cchiù no
siarvu a nnenta.
Gesù nuju rapprisenta.

'Ncunu mi vindiu pe trenta sordi arruggiati,
u mi pijjanu, vinnaru
cu cíantu sordati.
Vi paria ca scappava
o ca volava?
Si volia u m'inda scappu
avia già hfattu,
ma sugnu u hfijju du Signuri
e 'nci tiagnu o mio onuri.

Ccà, arrestatimi e jiamuninda
ca già scurau.
U tiampu passa
e u gaiu canta, e sta storia
'ncunu ava u ma cunta.
E tu Piatru non disperare,
sarai u primu a rinnegare.

Non è viaru ca siti amici,
ma accussì è scrittu
ed aviti raggiuni.
Non siti vui i 'mbrogghiuni.
A chi storia aviti i cuntare!
Siaculi e siaculi v'aspettano
ancora, mi raccumandu,
'mparativilla a mimoria.

Quanta stanchizza aju
'nto cuari, quanta tristizza
m'intorciunija.
Nuiju i sta muarti mu penijia.
Patre, no dicu cchiù nenta.
Sulu restai e sulu mi 'nda vaju
supa o Carvariu.

Aspettami Patre ca
stajiu arrivandu e attìa,
Maria, t'arraccumandu.
Guardala tu e na hfare penijiare.
Ancora supa a sta terra falla stare.

Puru a luna stanotte s'ammucciau.
Sulu restai e a forza m'abbandunau.
Eccumi, pijjiatimi e ammazzatimi,
mu vi hfinisce stu spassu disijatu!
Fin'allurtimu vi dicu ca sugnu
io u Signuri di lu cìalu mandatu!

Rivista Santa Maria del Bosco - 89822 Serra San Bruno. Reg. n. 1/15 Tribunale Vibo Valentia. Copyright © 2021 Rivista Santa Maria del Bosco. Tutti i diritti riservati. Web Designer Marco Calvetta

Top Desktop version

Questo sito utilizza cookies. Se vuoi saperne di più o negare il consenso a tutti o ad alcuni cookies clicca su “Maggiori Informazioni” e leggi l’informativa completa. Cliccando sul tasto “Accetto” acconsenti all’uso dei cookies. Maggiori Informazioni