Schiava, sempi cu la stessa stola
ciuccia di fatiga e d’ogni cumandu
intra, fora, all’anta sempi fatigandu
fiuffia lu vientu e para si l’abbola.
Cerna, crisara mia, cerna sapiri
e non lu stringiri cuomu na ligara
ca tuttu ‘ndi pigghianu e tuttu si ‘ndi vola
ma chiru chi ‘mparamma mai scumpara.
Na fiuffiata di vientu portau speranza
n’atra coraggiu e na quartara di sapienza
e cu lu suli s’abbistau la strata
mu vida sta fimmina cangiata.
Sta diebuli criatura perciau nu scuogghiu
all’arva di li tiempi e non vi ‘mbruogghiu
puru lu diavulu azziccau ‘ntra la buttigghia
n’uomu comuni ‘ntra nu bucu di gugghia.
Oh chi cuonzu, oh chi minditta!
Tessiu na stola e fìcia furtuna
e mo chi ormai parità fu ditta
si ‘ndi chianau alli corna di la luna.
‘Mpenduta ruocu statti
e fai cuomu lu cordaru:
P’arriedi e p’avanti
mu tieni lu mundu paru.
