U TRIPODÌAJIU ARRAGGIATU
C’era na vota, ‘nta nu focularu,
nu tripodiajiu nigru e arruggiatu
ca na matina si rivijjiau tutt’arraggiatu.
“Non cià hfazzu cchiù!
Na suppùartu sta cundanna!
Prima m’arrustanu, puà mi rifriscano
cu nu catu d’acqua ‘njelata,
pùa mi jettanu a na ripata.
Si mi va bbona mi dassano
‘nta cinnari cunzumata.
Ma u sapiti chi vi dicu?
Tri gambi ‘l’ajiu e minda vajiu!”
A hfiancu c’era nu pignatiajiu
chi gujjiìa chianu chianu
e mìanzu addormentato,
‘nci domandau:
“E duva tinda vai,
puru ca i gambi l’hai?”
“No sacciu e no tu dicu!
Pemmò su trùappu arraggiatu.
Ti pare giustu,
c’hajiu u suppùartu a chistu?
Ijiu sta assettatu cùamu
nu baruni ‘mpistunatu
ed io su tuttu ‘mbunnatu!”
“Chi vorrissi dira?”
Rispundiu u puzzunìattu,
quasi ‘nto gujjire.
“Puru io su nigru e ammaccatu.
Mi votanu, mi giranu
e mi mettanu i latu.”
“Ma chi vai dicìandu?
A vui vi pijjianu, vi votanu,
vi giranu, vi lavanu puliti puliti
e vi posanu sistemati.
Ammìa mi jettanu
cùamu mi trùavu trùavu
ammìanzu a surici e hfolijini
hfilati e sapiti chi vi dicu?
Vùajjiu cchiù rispìattu!
Sugnu io chi ti tìagnu, puzzunìattu!”
“Ohhh…e chi ti vinna?
Stamatina cummìa ta pijjiasti?
Cerca u stai ccittu e mutu,
ca si sulu nu tripùadi arruggiatu,
mancu u m’ìari nu rrè ‘ncurunatu!”
U tripodiajiu si ccittìu
quietu e penzerusu…
“Quasi, quasi, ‘nci hfazzu
nu partusu e u divacu, accussì
c’abbascìanu l’ali a stu ‘mbriacu.”
Tutti si ccittiru muti muti e
mentre a hfiamma s’arrìdia
zzumpìandu, u pignatiajiu
jìa penzandu…
“E chi mi vinna a mmia cu sti dui!
Vorrìa u dùarmu e no pùazzu hfare,
vorrìa u gridu e no pùazzu parrare.
Sti dui scìami su cumbinti, ca sulu iji
hannu i chi hfare.
Avìanu raggiuni a ggìanti antichi:
i guai da pignata, i sapa
a cucchiara chi manijia.
Sulu ijia, cummara mia,
u sapa cùamu mi sìantu.
M’inchìanu sempa
di ciciari e suriaca
e rujjiu pe tutta a jornata!”
Si rivijjiau u zzuccu
mianzu cunzumatu e nu gridu minau
pe tuttu u vicinatu:
“O povaru io a chi mani capitai!
Su tuttu vruscìatu!”
