PRIMO TEMPO- Anni 50-
Scena: Una stanza a piano terra rischiarata da una lucerna e con la porta che s’apre sulla strada.
Personaggi: due sorelle e un fratellino seduti attorno ad un braciere.
Azione: Si apre la porta e s’affaccia una giovane vicina di casa:
-Bonasira… mangiastivu?
-A Lina, thrasa, thrasa… ava assai chi mangiamma.
-Vui thri suli siti?…e fratita Peppi?
-Mo vena, jiu mu pigghia a fratima Brunu lu picciulu. Thrasa e assettati cu nnui allu vrashcieri…
pigghiati na seggia…mammata com’é?
-Mo nu puocu miegghiu. Chi buoi, l’età l’ava, puoi cu stu friddu… già si curcau… M’assiettu ccà ffora, non mi piacia mu staiu thruoppu vicinu allu fuocu. E cummari Gustina vena?
-Adidha stacimu aspittandu. Dissa ca stasira ndi cunta na paragula longa longa.
-Ammia li paraguli luonghi non tantu mi piacianu. Stasira puoi è già tardu, chi facimu?
spicciamu a mezannotti?…e mammata?.. Pathrita scrissa?
-Mama si ndi nchianau supa; puru idha jiu mu si curca. Non si fida mu stacia argiuta tantu tardu. Patrima scrissa e dissa ca ndi facia l’attu di richiamu mu ndindi jimu tutti all’America… mmienu mali ca manda corchi sordu mu tiramu. Ma mi para ca sta viniendu corcunu!… Va vidi a Rosa!
-Duvi vaiu? a Maria! mo apiru la porta mu guardu fora? Puoi si passa corchi mbracu, aiu mu sientu puru adiju. Va apira tu! Va.
-Signuri mieu! a cchissa non si po’ diri nenti. chi suoru caiu…ma dassa stari, dassa…ca non era nudhu, li pidati mò si sentanu luntanu…Nomm’era mpari Ntuoni? lu maritu di Francisca.
-Quali maritu di Francisca! astura mi para truoppu tardu mu si ricogghia di la campagna. E puoi, quando passa di cca ffora, si sentanu puru li campaniedhi di li crapi e, parrandu di crapi, ricordati ca dimani tocca attia muvai mu pigghj lu latti? Aieri iivi iieu…Sintisti a Maria?
-Si, si, ti ntisi, dimani vaiu iieu…non ti proccupari. Ndi nescia una lu minutu, sempi cu stu picchiu di vaiu iieu o vai tu. Guarda… pi dispiettu ti lu fazzu; di dimani in puoi vaiu sempi iieu, accussì la spicciamu mu ndi mbrigamu tutti li iiuorni pi stu santu latti.
-Madonna cuomu sù sti fimmini, sempi chi ssi mbriganu pi nenti. Sugnu iieu lu masculu minzanu? allura basta, di dimani…pillu latti vaiu sempi iieu; tutti li Jiuorni, va bè?
-A Ntuoni, na vota chi ndi dicisti una bona; e mò chi cuminciasti mu ragiuni d’uomu, fà na cosa chi serva: nchiana supa alla seggia e menta nu puocu d’uogghiu ntralla lumera ca si sta astutandu, e tira puru cchiu supa lu lucignu…e statti attientu nommu cadi. Ava thri iiuorni chi si furminau la lampidina e mama non si dicida mu l’accatta…Ti muovi?… a Ntuoni? cuttia staiu parrandu!
-A Maria! sacciu duv’è l’uogghiu? cu stu scuru si mientu li mani ntrallu stipu iettu tutti cuosi. Mi spagnu puru nommu mi muzzica corchi surici, e puoi non bbidi ca staiu attizzandu?
-Capiscivi va…lu frati minzanu! Lu surici avirìa mu ti muzzica chiju chi dicu iieu…e spicciala di maniiari sti vrashci ca stisidija lu carvuni e mi stai vrushciandu tutti li gambi.
-E sempi tu ti lagni?… Rosa no sta diciendu nenti…
-A Ntuoni! a mia mi para che ncazzunisti; no bbidi ca Rosa ava lu faddali davanti, ca si spagna nommu fa li fucidi?
-Viiu, viiu… Chidha chi non si vida è cummari Gustina. Vaiu mu la chiamu?
-Siii…mo vai girandu nthra stu scuru, a stura si curcau… Sicundu mia sappa puru di scurdari, tu chi dici a Lina?
-Iieu mi ndi tuornu alla casa, mo è tardu addavieru, cu mmama ntra llu liettu non mmi sientu mu staiu fora tantu tiempu.
-S’hai mu tindi vai vattindi. ti guardamu nui di la porta fina chi thrasi. Ndi vidimu dimani. Statti attenta nuommu attruoppichi….ma… aspetta, aspetta ca mi para ca vena corcunu. Madonna…cu sapa nommè cummari Gustina…
-Bonasiraaa… Ancora livati siti?
-A Peppi, ndi facisti mu nd’appaguramu…e fratita Bruniciedhu?
-Ndi misamu mu parramu culli ziani e s’adduormintau supa alla seggia. Mi dissa la zia mu lu dassu dhà, pi nnommu pigghia friddu. Lu curcamma cu cuginisa Biagiu. Dimani cullu iuornu si ricogghia.
-E capiru dui ntra chidhu liettu?
-L’aggiustamma di li pedi e nci misamu puru n’athra cuverta, non stacia tantu malu.
-… A Peppi vidi ca Lina si ndi sta turnandu alla casa, accumpagnala tu, ormai sìi già pigghiatu di friddu…
-Si,si, camina a Lina, tantu quattru passi sugnu. Chiuditivi la porta… tuornu viatu.
Si chiude il sipario
SECONDO TEMPO-ANNI 2000-
Scena: Una stanza, un tavolo, quattro sedie e un computer.
Personaggi: Due vecchie sedute ad un tavolo che guardano lo schermo di un computer e dueragazze che gironzolano intorno.
Azione: Una voce esterna (proveniente dal computer) dialoga con loro.
-Gud nait. Gud nait. Chi siti biedhi. Allivè li fimmini di la casa: Maria e Rosa allu paiisi, e nui: Ntuoni “lu minzanu” e“Brunu lu picciulu”, di l’atra vanda di lu mari. Si non murìa papà putivuvu viniri puru vui nthra sta terra. La mamma sindi iiu puru…e vui mbicchiastivu nthra ssa ruga. Cu si cridìa ca nu juornu avìa mu vi viiu culli capidhi ianchi… e puru mienzi rimbambiti…
-A Brunu, parra educatu cuomu t’imparau la mamma, e cu cchiu rispiettu pi lli cchiu randi di tia.
-Mo t’affindisti? Non bbidi ca cqhiecchiariiu. Vi mintistivu a rota? vi manca sulu lu vrashcieri!
-Chi vordiri…mo tu si cu ll’aria “caliiata”.. e divintasti puru cittadinu mericanu!
-Alla faccia vostra, ognunu capitau duvi voza lu distinu.. e Peppi e Lina? Né maritu e né mugghieri vinnaru mu ndi vidimu?
-Sugnu fora, accattau la figghia randi a Catanzaru…e mo divintaru nonni…iiru allu spitali.
-Ma vui, a Serra, non avivuvu nu spitali?
-Si, l’aviemu, ma lu chiusaru.
-E picchì?
-Non c’eranu malati.
-Capiscivi, staciti mpovariendu, armeno vi resta l’acqua.
-L’acqua? E si ti dicimu ca non avimu manc’acqua?
-Mo vuliti mu mi chiecchiariiati? Mbiati vui; veramenti puru cca li cuosi stannu cangiandu. Non è cchiu cuomu na vota, mò, cu sta crisi, non si chiecchiariia addavieru.
-Lu sapimu, la televisioni parra sempi di la crisi mericana, e cchiu assai di chista italiana.
-E vui, mò… a Serra, cuomu staciti?
-Nui?…Nenti…mancu ndi tocca sta cosa! fumma sempi nterra, e cchiu di cca duvi vuoi mu jimu?
-Mma… miegghiu mu canciamu discurzu. Ti ricuordi la vita di li tiempi di na vota?
-Mi ricuordu, si ca mi ricuordu… A Maria sienti, tu ti ricuordi chidha sira c’aspittavamu la cummari Gustina mu ndi cunta la paragula?…Picchì non vinna tandu?… Iieu era ancora zitiedhu…
-Jieu mi ricuordu sulu ca, la matina duoppu, la trhuvaru tosta ntrha llu liettu.
-Non mi lu ricurdava stu fattu…mi dispiacia mò pi tandu… Era brava cummari Gustina… mma, dassamu stari li cuosi viecchi e dicitimi que chi sta mamminiiandu cullu “mauss”; mi para ca vitti na figghia di Maria.
-Si idha è: Samanta, e puru la suoru picciula: Jessica. La sienti ca mò sta ridiendu arriedu li spadhi?… E cuttìa cu c’è?
-Figghiuma Robert; m’appicciau lu computer e sindi iiu ntrha l’athra stanza; cuomu ficia l’athra vota… ma mò torna. Culli cugini giuvini parra sempi, mbeci, m’appiccia mu ndi vidimu nui viecchi, nci ndi vola.
-A Peppi, vidi ca ccà comincia nommu si vida nenti, ti salutamu tutti e, non sacciu mancu si ndi sienti. Stu catinazzu di “scaippi” facia sempi accussì, ntra llu miegghiu ndi dassa mienzi angili e mienzi mbiati, e cu si vitta si vitta. Mò sona e frischia… nenti.. nenti…catta la linea. A Samanta , a Jessica, viditivila vui s’aviti m’astutati. Nui ndi ndi jimu nthralla cucina ca mò cumincianu “li pacchi” alla televisioni…
Si spegne lo schermo. Cala il sipario.
Fine
